କଟକ ଆଗ୍ରିଭେଟର ଅତ୍ୟାଧୁନିକ ଶସ୍ୟ ଭିତ୍ତିକ ଇଥାନଲ ପ୍ଲାଣ୍ଟ ଉଦ୍ଘାଟିତ
ଖବର ଓଡ଼ିଶା ବ୍ଯୂର: :ଦୈନିକ ୧୨୫ କିଲୋଲିଟର କ୍ଷମତା ବିଶିଷ୍ଟ ଏହି ପ୍ଲାଣ୍ଟରେ ଅତ୍ୟାଧୁନିକ ଜ୍ଞାନକୌଶଳ ବ୍ୟବହାର କରାଯାଇ ନଷ୍ଟ ହୋଇଥିବା ଶସ୍ୟ / ଭଙ୍ଗା ଚାଉଳ ଓ ମ କାରୁ ଇଥାନଲ ଉତ୍ପାଦନ କରାଯିବ
• ପ୍ରାୟ ୨୫୦ ପ୍ରତ୍ୟକ୍ଷ ନିଯୁକ୍ତି ଏବଂ ୧୦୦୦ରୁ ଅଧିକ ପରୋକ୍ଷ ନିଯୁକ୍ତି ସୁଯୋଗ ସୃଷ୍ଟି
• ୩୦ ହଜାରରୁ ଅଧିକ ଚାଷୀ ଉପକୃତ ହେବେ
କଟକ/ ଭୁବନେଶ୍ଵର, ୧୮ ଜୁନ ୨୦୨୪:
ଭାରତର ସ୍ୱଚ୍ଛ ଶକ୍ତି କ୍ଷେତ୍ରକୁ ସୁଦୃଢ କରି ମାନ୍ୟବର ସାଂସଦ (ଭୁବନେଶ୍ୱର) ଶ୍ରୀମତୀ ଅପରାଜିତା ଷଡ଼ଙ୍ଗୀ ଆଜି କଟକ ବାଁଆରା ଠାରେ କଟକ ଆଗ୍ରିଭେଟ ଦ୍ବାରା ନିର୍ମିତ ଅତ୍ୟାଧୁନିକ ଶସ୍ୟ ଭିତ୍ତିକ ଇଥାନଲ ପ୍ଲାଣ୍ଟକୁ ଉଦଘାଟନ କରିଛନ୍ତି । ସମ୍ମାନିତ ଅତିଥି ଭାବେ ବାଙ୍କୀ ବିଧାୟକ ଶ୍ରୀ ଦେବୀ ପ୍ରସାଦ ତ୍ରିପାଠୀ ଯୋଗ ଦେଇଥିଲେ । ଏହି ଅବସରରେ କଟକ ଜିଲ୍ଲାପାଳ ଶ୍ରୀ ଅରିନ୍ଦମ ଡାକୁଆ (ଆଇଏଏସ୍), କଟକ ଗ୍ରାମାଞ୍ଚଳର ପୁଲିସ ଅଧୀକ୍ଷକ ଶ୍ରୀମତୀ ଏଲ. ଦିବ୍ୟା (ଆଇପିଏସ୍) ଓ କଟକ ଆଗ୍ରିଭେଟ୍ ଲିମିଟେଡ୍ ର ପରିଚାଳନା ନିର୍ଦ୍ଦେଶକ ଶ୍ରୀ ମୋହିତ ସିଙ୍ଗଲା ପ୍ରମୁଖ ଉପସ୍ଥିତ ଥିଲେ ।
ଦୈନିକ ୧୨୫ କିଲୋଲିଟର ଉତ୍ପାଦନ କ୍ଷମତା ବିଶିଷ୍ଟ ଏହି ଇଥାନଲ କାରଖାନା ଅତ୍ୟାଧୁନିକ ଜ୍ଞାନକୌଶଳ ବ୍ୟବହାର କରି ନଷ୍ଟ ହୋଇଥିବା ଶସ୍ୟ/ଭଙ୍ଗା ଚାଉଳ ଏବଂ ମକାରୁ ଇଥାନଲ ଉତ୍ପାଦନ କରିବ, ଯାହା ଜୈବ ଇନ୍ଧନ ଭାବରେ ପେଟ୍ରୋଲିୟମ ସହିତ ମିଶ୍ରଣ କରାଯିବ । ଏହି କାରଖାନା ଭାରତ ସରକାରଙ୍କ ଜାତୀୟ ଜୈବ ଇନ୍ଧନ ନୀତି ଅନୁଯାୟୀ ଅଟେ, ଯାହା ଆମଦାନୀ ହେଉଥିବା ଅଶୋଧିତ ତୈଳ ଉପରେ ନିର୍ଭରଶୀଳତା ହ୍ରାସ କରିବା ପାଇଁ ଜୈବ ଇନ୍ଧନ ଉତ୍ପାଦନକୁ ପ୍ରୋତ୍ସାହିତ କରିଥାଏ ।
ଏହି ଅବସରରେ ମୁଖ୍ୟ ଅତିଥି ଶ୍ରୀମତୀ ଷଡ଼ଙ୍ଗୀ କହିଛନ୍ତି ଯେ, ଏହି ଶସ୍ୟ ଭିତ୍ତିକ ଇଥାନଲ୍ କାରଖାନା ପରିବେଶ ନିରନ୍ତରତା ହାସଲ ଏବଂ ଗ୍ରାମାଞ୍ଚଳର ଲୋକମାନଙ୍କୁ ସଶକ୍ତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ମୁଁ ଆଶା କରୁଛି ଯେ ଯେ ଏହି କାରଖାନା ସ୍ଥାନୀୟ ଅଞ୍ଚଳର ଅର୍ଥନୈତିକ ସଶକ୍ତୀକରଣରେ ସହାୟକ ହେବ ।
ସମ୍ମାନିତ ଅତିଥି ଶ୍ରୀ ତ୍ରିପାଠୀ ଓଡ଼ିଶାରେ ଏକ ଆଧୁନିକ ଇଥାନଲ ପ୍ଲାଣ୍ଟ ନିର୍ମାଣ କରିଥିବାରୁ କଟକ ଆଗ୍ରିଭେଟକୁ ପ୍ରଶଂସା କରିଥିଲେ ।
ଏହି ଇଥାନଲ ପ୍ଲାଣ୍ଟରେ ଅତ୍ୟାଧୁନିକ ଜ୍ଞାନକୌଶଳ ରହିଛି, ଯାହା ଏହାକୁ ଜିରୋ ଲିକ୍ଵିଡ୍ ଡିସଚାର୍ଜ କାରଖାନାରେ ପରିଣତ କରିଛି । ଏହି କାରଖାନା ଯୋଗୁଁ ପ୍ରାୟ ୨୫୦ ଟି ପ୍ରତ୍ୟକ୍ଷ ନିଯୁକ୍ତି ସୁଯୋଗ ଏବଂ ୧୦୦୦ ରୁ ଅଧିକ ପରୋକ୍ଷ ନିଯୁକ୍ତି ସୁଯୋଗ ସୃଷ୍ଟି ହୋଇଛି । ଶସ୍ୟ ଉତ୍ପାଦନ ପାଇଁ ଏକ ସୁଦୃଢ଼ ବଜାର ସୃଷ୍ଟି କରି ଏହି କାରଖାନା ସ୍ଥାନୀୟ କୃଷକମାନଙ୍କୁ ସଶକ୍ତ କରିବ ବୋଲି ଆଶା କରାଯାଉଛି । ଏହି ପ୍ଲାଣ୍ଟ ଦ୍ୱାରା ୩୦ ହଜାରରୁ ଅଧିକ ଚାଷୀ ଉପକୃତ ହୋଇ ପାରିବେ ।
"ଏହି ଶସ୍ୟ ଭିତ୍ତିକ ଇଥାନଲ୍ ପ୍ଳାଣ୍ଟ ପ୍ରତିଷ୍ଠା ସହିତ, ଭାରତର ସ୍ଥାୟୀ ଶକ୍ତି କ୍ଷେତ୍ରରେ ଯୋଗଦାନ ଏବଂ ଗ୍ରାମାଞ୍ଚଳରେ ଅର୍ଥନୈତିକ ଅଭିବୃଦ୍ଧିକୁ ପ୍ରୋତ୍ସାହିତ କରି ଆମେ ଆନନ୍ଦିତ । ଅତ୍ୟାଧୁନିକ ଜ୍ଞାନକୌଶଳ ବ୍ୟବହାର କରି ଆମେ ଶୂନ୍ୟ ବର୍ଜ୍ୟବସ୍ତୁ ନିଷ୍କାସନକୁ ସୁନିଶ୍ଚିତ କରିପରିଛୁ, ଯାହା ନିରନ୍ତର ବିକାଶ ପାଇଁ ଆମର ପ୍ରତିବଦ୍ଧତାକୁ ପ୍ରତିଫଳିତ କରୁଛି,” ବୋଲି କଟକ ଆଗ୍ରିଭେଟ୍ ଲିମିଟେଡ୍ ର ପରିଚାଳନା ନିର୍ଦ୍ଦେଶକ ଶ୍ରୀ ମୋହିତ ସିଙ୍ଗଲା କହିଛନ୍ତି । ଭବିଷ୍ୟତରେ କଟକ ଆଗ୍ରିଭେଟ୍ ମାଲ୍ଟ, ଗ୍ଲୁକୋଜ୍, ଷ୍ଟାର୍ଚ ସମେତ ଅନେକ ନୂଆ ମକା ଭିତ୍ତିକ ଉତ୍ପାଦ ଆଣି ଏହାର ଉତ୍ପାଦ ଅଫରକୁ ବିସ୍ତାର କରିବ ବୋଲି ସେ ସୂଚନା ଦେଇଥିଲେ ।
ଏହି ଅବସରରେ କମ୍ପାନୀର ଲୋକ ସମ୍ପର୍କ ମୁଖ୍ୟ ସୁଶୀଲ କୁମାର ମିଶ୍ରଙ୍କ ସମେତ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ଇଥାନଲ ଯୋଗାଣ ପାଇଁ କଟକ ଆଗ୍ରିଭେଟ ଭାରତ ପେଟ୍ରୋଲିୟମ, ଇଣ୍ଡିଆନ ଅଏଲ ଓ ହିନ୍ଦୁସ୍ତାନ ପେଟ୍ରୋଲିୟମ ସହ ୧୦ ବର୍ଷ ପାଇଁ ଚୁକ୍ତି ସ୍ବାକ୍ଷର କରିଛି ।
